रौतहटको राजदेवी नगरपालिका–९, ब्रह्मपुरीमा चिसो मौसमका कारण जनजीवन अस्तव्यस्त बनेको अवस्थामा गरिब तथा विपन्न समुदायलाई लक्षित गरी न्यानो कपडा तथा आवश्यक सामग्री वितरण गरिएको छ ।
राजदेवी नगरपालिकाकी पूर्व उप–मेयर तथा मेयर प्रत्यासी अंशु सिंहको नेतृत्वमा हरेक वर्ष झैँ यस वर्ष पनि जाडो राहत कार्यक्रम सञ्चालन गरिएको हो । कार्यक्रममा स्थानीय गरिब, असहाय तथा सीमान्तकृत परिवारलाई ज्याकेट, सलवार–चिट, लुगा–कपडालगायत जाडो छल्न सहयोगी सामग्री वितरण गरिएको थियो ।
राहत वितरण कार्यक्रममा बोल्दै नेतृ अंशु सिंहले भन्नुभयो, “जाडोको कठ्यांग्रिने चिसोमा विपन्न समुदाय सबैभन्दा बढी प्रभावित हुन्छन् । उनीहरूको पीडामा सानो भए पनि मल्हम लगाउने उद्देश्यले हरेक वर्ष निरन्तर रूपमा यो कार्यक्रम गर्दै आएका छौँ ।
जाडो बढेसँगै दैनिक जीवनयापनमा कठिनाइ भोग्दै आएका समुदायलाई राहत पुर्याउने उद्देश्यले कार्यक्रम आयोजना गरिएको बताइएको छ । यस किसिमका सामाजिक उत्तरदायित्वका कार्यले समाजमा सहकार्य, सहयोग र मानवीय संवेदनशीलता अभिवृद्धि हुने विश्वास व्यक्त गरिएको छ ।
स्थानीयवासीहरूले चिसो मौसममा न्यानो सामग्री पाउँदा राहत महसुस भएको प्रतिक्रिया दिएका छन् । उनीहरूले यस्ता कार्यक्रमले गरिब तथा विपन्न वर्गको जीवनमा सकारात्मक प्रभाव पार्ने बताएका छन् ।
स्थानीय तहमा निरन्तर रूपमा सञ्चालन हुँदै आएका यस्ता मानवीय पहलले सामाजिक सद्भाव मजबुत बनाउनुका साथै विपन्न समुदायप्रतिको दायित्व स्मरण गराउने अपेक्षा गरिएको छ ।
