शैलेश गुप्ता
पोखरिया । पर्साको पोखरिया नगरपालिका–५ सतवरियास्थित दलित बस्तीका ३५ वटा घरमा पानी पसेर बस्ती पूर्ण रूपमा जलमग्न भएको छ। घरभित्र पानी पस्दा स्थानीय बासिन्दाको जनजीवन प्रभावित बनेको छ।
करीब १ सयदेखि १ सय ५० जनासम्मको परिवारले समाचार संकलन गर्ने समयमा समेत खाना खाएका थिएनन्। पानीका कारण चुलो बल्न सकेको थिएन। ती परिवारका बालबालिकाले खान नपाउँदा रुई–कराई गरिरहेका थिए।
अभिभावकहरूको भनाइअनुसार घरभित्र २ फिटदेखि ४ फिटसम्म पानी जमेकाले पानी नघटेसम्म खाना पकाउन, खान, बस्न र सुत्न समस्या भएको छ। पीडित परिवारहरूले तत्काल राहतका लागि सम्बन्धित निकायसँग गुहार गरेका छन्।
