मेवालाल यादव
रौतहट । जनमत पार्टीका स्थायी समिति सदस्य ई. दीपक कुमार साहले पार्टीभित्र नेतृत्व चयनमा बढ्दो “परिवारवाद”प्रति कडा आपत्ति जनाउँदै सार्वजनिक रूपमा गम्भीर असन्तुष्टि व्यक्त गरेका छन्।
एक प्रेस विज्ञप्ति जारी गर्दै उनले पार्टी अध्यक्षले आफ्ना पारिवारिक सदस्यहरूलाई योजनाबद्ध ढंगले उच्च पदमा मनोनयन गर्दै पार्टीको आन्तरिक लोकतन्त्र र मूल्य–मान्यतालाई कमजोर बनाएको आरोप लगाएका छन्।
साहका अनुसार, २०७७ सालमा अध्यक्षकी श्रीमती बबिता कुमारी राउतलाई उपाध्यक्ष पदमा नियुक्त गरेर सुरु भएको यो प्रवृत्ति हाल अध्यक्षका दाजु डा. जय कान्त राउतलाई राष्ट्रिय उपाध्यक्ष पदमा मनोनयनसँगै झन स्पष्ट भएको छ। उनले अघिल्लो जिम्मेवारीहरू जस्तै योजना आयोग सदस्य, राष्ट्रिय परिषद अध्यक्ष, संगठन विभाग प्रमुख लगायतका जिम्मेवारीहरू पनि परिवारिक घेराभित्रै सिमित राखिएको गुनासो गरे।
साथै, स्थायी समिति सदस्य तथा उपाध्यक्ष नरेन्द्र चौधरीका दाजु दान बहादुर चौधरी, जो पहिले पार्टीविरोधी गतिविधिमा संलग्न थिए, उनलाई राष्ट्रिय उपाध्यक्षको जिम्मेवारी दिनु “पार्टी आस्था र मूल्यमा गम्भीर प्रहार” भएको साहले जनाएका छन्।
ई. दीपक कुमार साहले संगठन निर्माणमा योगदान दिएका नेताहरू—जस्तै इ. कबिन्द्र यादव र इ. सुरेन्द्र नारायण यादव—लाई पन्छाउँदै गरिएको निर्णयप्रति गहिरो चिन्ता व्यक्त गर्दै पाँच बुँदे माग अघि सारेका छन्। ती मागहरूमा पारिवारिक सञ्जालको अन्त्य, योग्य कार्यकर्ताको प्रतिनिधित्व, पारदर्शिता, पुराना नेताहरूको सम्मान र नेतृत्व शैलीमा सुधारजस्ता विषयहरू समावेश छन्।
उनले चेतावनी दिएका छन् कि पार्टीभित्र आलोचना, आत्मसमीक्षा र सुधारको संस्कार नबसालिए मधेशका जनताको विश्वास गुमिने खतरा बढेको छ। “भविष्यमा पार्टीले क्षति बेहोर्नुपरेमा यसको जिम्मेवारी नेतृत्वले लिनुपर्नेछ,” विज्ञप्तिमा उल्लेख गरिएको छ।
